Anárašmáđe merken

Unjárgga gielda lea dál merkemin Anárašmáđe, dološ máđđi Čeavetjávrris Suomabealdi Stuorravunnii Unjárgga gielddas vai šaddá geasuheaddji mátkeealáhusfálaldahkan.  Unjárgga gielda, Sámediggi,  Finnmárkku fylkkagielda ja Naturarven som verdiskaper ruhtadit prošeavtta.

Árbevirolaš bargu čuovvu buolvvas bulvii – gurut bealde Einar Roska, John-Arne Neshavn, Mikkel Smuk Neshav ja Anders Nils Smuk

Merkenbargui leat  ráhkkanan lagaš ovttasbargguin gaskal eanaeaiggát FeFoin ja Orohat 6:ain geain lea dálveorohat dáin guovlluin  Bálgá merket cekkežiiguin ja uraiguin mii lea dološ merkenvuohki. Earuhan dihte eará geđggiid luonddus, de merket  cekkežiid fiskes málain  vai bálgá lea álkit čuovvut.

Sámediggi guhte maid lea kulturmuitosuodjalaneiseváldi háliidii fitnat ovdalgo bálgá merkenbargu  álggii, merkemin vejolaš kulturmuittuid goabbat beale bálgá ja dolastansajiid birrasis.  Luohtu gos bálggis manná leamašan dehálaš guovlu gos olbmot leat viežžan áigáiboađuset don dološ rájes, ja maiddái bálggis/máđđi lea iešalddis dehálaš kulturmuitu.  Kulturmuitomerken mátkkis 8.7. gávnnai Várjjat  Sámi  Musea hoavda ja arkeologa Kjersti Schanche, Geadjájávrri lahka ea.ea.geađgebori gosa olbmot ovddeš áiggid lávejedje biergguid čiehkat. 

Oidnogo cekkeš doarvái bures – Gurut bealde Einar Roska, Mikkel Smuk Neshavn, Stian Rennemo, Anders Nils Smuk

Bargui leat bálkáhan golbma nuorra virkos albmá. Ovdalgo dollejedje meahccái, de fertejedje oahppat  oalle vuđolaččat mo galge merket bálgá/máđi. Oahppat mo bardit/muvrret ura ja  man láhkái  ja gokko bidjat cekkežiid  lea hui dehálaš ja árbevirolaš máhttu  maid ain galggašii seailluhit buolvvas nubbái.

Govva: Svein Harald Holmen