Sámi giellakonferánsa

Sámi giellakonferánsa guovvamánu 29.beaivve 2012

Isak Saba guovddáš bovde sámi giellakonferánsii, guovvamánu 29 b. tii. 0900 – 1500, Searvegottevisttis, Vuonnabađas. Konferánssa fáddá lea vánhenrolla gielladikšumis.
Ulbmiljoavku leat vánhemat, ovddasteaddjit,  skuvla- ja mánáidgárdebargit, ja buohkat geat háliidit gáhttet sámegiela.

Logaldallit leat:
-    Elisabeth Utsi Gaup, prošeakta jođiheaddji Sámi Allaskuvllas.
-    Vánhen Silje Muotka muitala makkár hástalusat vánhemiin lea gielladikšumis.
-    Dearvvašvuođa divššár, Heidi Jernsletten, muitala mo Unjárgga mánáid giella lea.
-    Jane Juuso, Isak Saba guovddáža prošeaktajođiheaddji, logaldallá Isak Saba guovddáža prošeavttaid birra ja vásáhusaid daid bokte.

Sámedikke ráđđeláhttu Ellinor Jåma rahpá giellaseminára. Mii leat maid bovden báikkálaš musihkka čehpiid guoimmuhit.  Beaivvi loahpas lea panel-digaštallan gos buohkain lea vejolašvuohta muitalit iežaset vásáhusaid ja oaiviliid.

Konferánssa ulbmil lea ságaškuššat ja digaštallat makkár rolla vánhemin, ovddasteaddjin ja lagasbirrasis lea máná sámegiela dikšumis.

Mii áigut digaštallat:
•    Makkár hástalusat bearrašis leat go válljejit sámástit mánáideasetguin.
•    Mo fuomášuhttit ja movttiidahttit vánhemiid geavahit sámegiela
•    Háleštit man dehálaš lagašbirrasa,vánhemiid/ovddasteddjiid  giella lea máná giellaovdáneapmái.

Dieđihanmáksu: 300 kr. oasseváldiin geat bohtet almmolaš ásahusain. Sii geat oasálastet priváhta olmmožin besset nuvttá.
 
Dieđihanáigemearri lea 22.02.12 Isak Saba guovddážii e-poasta čujuhus:
isaksaba@nesseby.no
Dahje tlf-nummirat: 40440545 – 49.



Prográmma