Sátnejođiheaddji Sámi álbmotbeaivve sárdni 2006.s

Buorit Unjárgga gieldda ássit!

Sámieatnan sohkagoddi

dat lea gierdán doddjokeahttá

goddi čuđiid, garrogávppiid,

viehkes vearre-vearroválddiid.

Ná e.e. čálii unjárgalaš Isak Saba sámeálbmoga ja stuorraservodaga oktavuođa  birra iežas lávllateavsttas mii almmuhuvvui vuosttas háve 1906:as.  Isak Saba lávlla dohkkehuvvui 80 jagi maŋŋá, 1986 Sámi soga lávllan.    

1906 válljejuvvui son maiddái Stuorradiggái. 

Ja nu livčče ge maiddái dát jahki; 2006 -  galgan leat Isak Saba ávvudanjahki!   Go Isak Saba dagai dan maid ii oktage sápmelaš lei dahkan:  son lei vuosttaš sápmelaš Stuorradikkis ja son bijai Unjárgga gielda kártii! 

Mu sávaldat lea ge ahte Sámediggi sáhtášii gudnejahttit sámiid vuosttaš Stuorradigge -politihkkára, Isak Saba  - 1906-2006!

Go vilppastit máŋusguvlui ja oaidnit makkár áššiiguin Isak Saba ražai 100 jagi áigge, de sáhttá duođaid sihke imaštišgoahtit gosa sámeáššit duođaid jorret, ja maiddái oaidnit ahte politihkkálaš bargguid maid son álggahii leat ávkin leamaš sámiide. 

Go Isak Saba “vaibmo-áššit” ledje e.e. dát:

·        Sámemánát galget beassat sámegiela oahppat skuvllas,girjjit galget leat sámegillii ja Ipmilbálvalusat galget dollojuvvot  sámegillii. 

Dát orrut leamen hui dovddus áššit sámiide vel odne ge.  Go ain dál, 100 jagi maŋŋá, lea stuorra hástalus fidnet sámegielat oahpaheaddjiid min skuvllaide, ja báhpaid fal guhkkin eret!  Oahppogirjjit sámegillii buot luohkkáide, juohke fágas lea ain dušše fal niehku. 

Eará ášši mii Isak Saba politihkkálaš prográmmas lei, lei dát:

·        Sámiin galget leat seammá vuoigatvuohta go dážain  eatnamiid oastimii

Norgga eiseváldit leat aiddo mearridan eatnamiid ja čáziid stivrejumi rievdadit Finnmárkkus, ja vuosttas Finnmárkku opmodaga stivra lea ge aiddobeliid nammaduvvon.  Stivrenváldi lea sirddašuvvon Stáhtas ođđa Finnmárkku Opmodaga stivrii, gos lea seammá áirraslohku Sámedikkis válljejuvvon go Filkkadikkis.  Dát duođaštuvvo ahte Isak Saba rahčamuš sámiide oažžut seammá vuoigatvuođaid eatnamiidda viimmat lea ollášuhtton, ja viimmat …quot; go dat ádjánii 100 jagi!

·        Isak Saba mielas ledje maiddái dát áššit deaŧálažža :  vuotnaguolásteaddjit galge ain beassat ruoššaiguin gávpašit, ja boazodoallit galge beassat bohccuideaset guođihit riikka rajáid rastá. 

Odná stáhta lohká ahte vuotnabivdin eai leat ban makkárge bivdinvuoigatvuođaid, ja Norgga ja Ruošša gaskkas ii dáidde leat menddo buorre dilli, go diehtit at Ruošša ii fuola šat Norgga luosas ja Norga fas bivdá ruošša tråláriid kánonaiguin...

Manne son mun hálan nu ollu Isak Saba birra Sámi álbmotbeaivvi 2006 ávvudeami oktavuođas? 

Mu mielas eallá Isak Saba vuoigŋa ain dáppe Unjárggas.  Gielda lea ásahan giella- ja kulturguovddáža mii guoddá Isak Saba nama; namalassii Isak Saba guovddáš. 

Isak Saba guovddážis orru hui ollu dáhpáhuvvamin, dat nieiddat ja okta gánda geat doppe barget orrut dego buohkat livčče galgan leat Isak Saba maŋisboahttit. 

Ja mii galgat ge dás beassat oaidnit 2 áibbas ođđa girjji maid sii leat ráhkadan. 

Sávaldat lea ahte mii buohkat barggašeimmet dan nammii, seailluhit ja ovdánahttit sáme giela ja kultuvrra vai Unjárgga gielda nannosmáhttošuvvašii ja vai gieldda nuorat dustešedje boahteáiggi nana sámi identitehtain ja iešdovdduin! 

Mun sávan lihkku Isak Saba guovddžii girjealmmuhemiiguin ja sávan buohkaide lihku Sámi álbmotbeivviin!

sátnejođiheaddji