VEARRODAHKOPOLITIHKKA GUOVLLOGIELDDAIN

Unjárgga ovdagoddi ja gielddastivra leaba ollu jagiid dahkan mearrádusaid ahte eaba dán áššis oainne logihkka ja jierbmálašvuođa. Mii leat sádden min mearrádusaid politimeašttiriida, direktoratii, vuoigatvuođalávdegoddái, vuoigatvuođaministarii j.n.a. Eat goassige leat fástádusa ožžon. Politiimeašttir lea gal guovlladan gielddavisttis ja ákkástallan oainnus: leansmánni galgá eret gielddas fárret - beroškeahttá maid gieldda olbmot oaivvildit dán áššis. 

Mu oainnu mielde leat Stuorradikkepolitihkkárat addán buot válddi ja fámu dán dehálaš áššis Politiidirektoráhta byrokráhtaide. Dárbboárvvoštallamat ahte galget go politeaddjit ja leansmánne buot Norgga gielddain lea čáđahuvvon gielddaid cealkkámušaid haga; measta dego dát ášši ii oppanassiige guoskka gielddaide! Mu mielas orru dán ášši proseassa ja ovttasdoaimma váilevašvuohta lea eahpedemokráhtalaš ja badjelgeahččanvuohta.

Min politihkkáriid ovddasvástádus lea surgat iežamet gieldda ássiide oadjebasvuođa ja buriid bálvalusaid.  Midjiide lea áibbas veadjemeahttun ášši čoavdit go eai beroš min oaivviliid gullat oppanassiige. Poltiteaddjiid ráđit ja čuoččohusat bálvalusaid buoridit go leansmánni fárre eret gielddas ii leat logihkálaš ja goittot ii jáhkehahtti.  

Stáhta lea aktiiválaččat ieš mielde jávkadeamin gilážiid go loahpaha/binnuda bálvalusfálaldagaid maid buot áidna ássi riikkas dárbbaša beroškeahttá ássanbáikki. Juohka virgi maid jávkada fárre olles bearaš gilis eret. Juohke bálvlalusfálaldat mii gielddas jávká buktá váttisvuođaid olbmuid deike oažžut fárret. Olbmot isket ovdal go fárrejit makkár bálvalusfálaldagat gávdnojit gielddas, ja ahte "beivválašfálaldagat" jávket smávvagielddain ii goittot veahket olmmošlogu bajás oažžut.  Dán láhkái láhčá lági stáhta A ja B gielddaid ja A ja B ássiid...  

Mun lean maŋimus áiggiid váldán oktavuođa guovllusátnejođiheaddjiiguin miehtá riika. Buohkain leai fuones dovdu. Mii ballat ahte ássiid oadjebasvuhta lea áitojuvvon, ja mii árvvoštallat ráhkadit albma sátnejođiheaddjiidstuimmiid!

Ann Jorid Henriksen sátnejođiheaddji