Oarje Várjjaga ovttasbarggu čielggadus lea sáddejuvvon politihkalaš meannudeapmái
Govva: Lena Kristiansen
Čielggadus Oarje Várjjaga ovttasbarggu birra lea dál sáddejuvvon ovdagoddái ja suohkanstivrii politihkalaš meannudeapmái. Gielddastivra diŋgui čielggadeami gielddadirektevrras geassemánus.
| Čielggadus Oarje Várjjaga ovttasbarggus Unjárgga perspektiivvain pdf, 1 MB, åpnes i nytt vindu. |
Gieldadirektevra lea ráhkadan raportta, ja das árvvoštallo mo ovttasbargu doaibmá Unjárgga ektui. Dat čujuha sihke ávkkiide ja hástalusaide. Ovttasbargu addá earret eará stuorát fágabirrasiid, eanet stabiila bálvalusaid ja eanet guvllolaš váikkuhanfámu. Seammás dárbbašuvvojit čielgaset hálddašanlinnját, buoret raporteren ja nannejuvvon kapasitehta báikkálaš hálddahusas.
Čielggadus čujuha maiddái vejolašvuođaide boahtteáiggis. Unjárga lea árvvoštallojuvvon leat bures sajáiduvvan NAV lágideaddjigieldan jagi 2026 rájes, gieldan mas lea sámi giella- ja kulturgelbbolašvuohta, viiddis bargomárkan ja heivvolaš visttit ja lanjat. Guhkit áiggi vuollái ovttasbargu sáhttá ovdánit 5K-guvlui (ovttas Čáhcesulluin) dahje 6K-guvlui (ovttas sihke Čáhcesulluin ja Várggáin). Dát sáhtášii addit vel nannoset fágabirrasiid, muhto dat maiddái váttásmahtášii jođiheami.
Čielggadus lea Unjárgga oassi boahtteáiggi gulahallamii gielddaid gaskkas. Dat galgá addit báikkálaš politihkkáriidda strategalaš vuođu árvvoštallat mo gielda buoremusat sáhttá fuolahit iežas beroštumiid ovttasbarggus.
Gielddastivra meannuda ášši golggotmánu 16. beaivve.
Sist oppdatert