20Buss

Bisuhit girjebusse!

Ruhtadeapmi lea ortnegis ja nu girjebussejuvllat eai heaitte jorramis.

Olles čavčča leat sihke politihkkárat ja hálddahus ráhčan ruhtademiin girjebussii vai nagodit hukset fálaldaga Unjárgga- ja Deanogieldda álbmogii. Sámediggi geahpedii girjebusse ruhtadoarjaga lagabui 1.4 millijovnna ruvnnuin mii dagahii stuorra eahpesihkarvuođa girjebusse boahtteáigái. Sihke Unjárgga- ja Deanogieldda politihkkárat ledje seamma oaivilis čoavdit dan hástalusa, ja nu sii dahke. Lea maiddái illusáhka ahte Finnmárkku fylkkakommunalat politihkkárat jotket Girjebussii addit ruhtadoarjaga. Mii dovdat Finnmárkku gilážiid gaskkaid ja diehttit álbmogis lea dárbu girjebussefálaldahkii.

Mii leat maiddái olles čavčča gulahallan Ohcejoga gielddain guhte oaččui dieđu čakčamánus ahte sin girjebusse ovttasbargo Kárášjogain ja Porsáŋgguin heaittihuvvo juovlamánu 2019 rájes. Ovdalaš juovllaid mii dagaimet šiehtadusa Ohcejoga gielddain ahte sii ostet girjebusse fálaldaga Deanu/Unjárgga Girjebusses jagi 2020. Šiehtadus árvvoštallojuvvo jagi ollodahkii, veardidan dihte galgá go maiddái Ohcejohka gielda beassat oamasteaddjin jagi 2021 rájes. Girjebusse lea jo vuoddján vuosttas tuvrraid Ohcejoga gielddas gos sii leat váldán min hui bures vuostá.

Lea mearriduvvon ahte mii eat ráhkat fysalaš ruvttoplána vuosttas jahkebeallái dán jagis – don gávnnat orustanbáikkiid ja dáhtoniid http://bibliotekbussen.no siiddus. Lea ráhkaduvvon áibbas ođđa ruvttoplána ja danin ferte Girjebusse beassat dađistaga veardidit ja heivehit ruvtto buoremusat lági mielde. Girjebusses leamaš jo dárbu rievdadit ruvtto vuosttas mátki maŋŋá. Jus geas ge lea evttohusat dahje sávaldagat rievdadusaide, de lea vejolaš sáddet daid girjerájushovdii Jørgen Bettenii jorgen.betten@nesseby.kommune.no čujuhussii. Soaittát dárbbašit lagabui orustanbáikki, dahje eai várra heive orustanáiggit, dahje dieđát muhton olbmo guhte ii goastta nu guhkás ja gii dárbbašivčče dán fálaldaga. Dieđus eai leat buot sávaldagaid maid sáhttit vuhtiiváldit, muhto giitit buot dávistemiid ovddas.

 

21.01.2020 Máret Ingá Smuk
Tips en venn  Skriv ut