Nannejit drona – vákšuma Finnmárkkus

.Fuomášan dihtii dronaid mat leat jođus doppe gos eai gálgga leat, de bidjet Norgga áibmosuodjalussensoriid Girkonjárgga guvlui Finnmárkkus. Gozihanvuogádat galgá veahkehit sihkkarastit árra fuomášumi ja váruhusa, jus šaddá dilli mas leat dronat jođus báikkiin gos dat eai galgga leat.

Lea deaŧalaš deattuhit ahte sihkarvuođapolitihkalaš dilli ii leat rievdan Norggas, eaige áitagat ge leat rievdan.

Seammás lea Ukraina dronaid gažaldat dovddus ja bajimusas áššelisttus buot NATO-riikkain. Vaikke várra ahte dát dáhpáhuvvá Norggas lea hui uhcci, de lea vejolaš ahte ovdamearkka dihte Ruošša GPS-seaguheapmi davvin sáhttá doalvut Ukraina dronaid Norgga guvlui.

Áibmosuodjalussensorat galget danne leat veahkkin nannet Norgga suverenitehta, sihkkarastit Norgga beroštumiid ja suodjalit davvi ássiid, jus dronat bohtet min guvlui. Álggos vákšunvuogádat bistá gitta 2026 rádjái.

Dakkár dáhpáhusain gos dronat sáhttet dagahit garra vára eallimii ja dearvvašvuhtii Norggas, de sáddejit politiijat Heahtedieđiheami mátketelefovnnaide guovlluin masa dilli guoská. Dát dieđiheapmi sisttisdoallá dieđuid das maid olbmot galget dahkat iežaset suodjaleami várás.

Ohcat suodji doppe gos leat, sáhttá máŋgga dilis leat buoret go lihkadit stuorát gaskkaid ohcat suoji. Dalle galggat vuolgit keallárii, jus dat lea vejolaš, ja mannat sisa ja bissut eret uvssaid luhtte.

Jus visttis ii leat keallir, de galggat ohcat suoji dakkár sajiin visttis gos visti lea čavddis, ovdamearkka dihte tráhpain.

Áibmosuodjalussensorat leat eastadeaddji doaibmabijut mat galget nannet bearráigeahču áibmoguovllus Norgga rádjeguovlluin.

Suodjalusas leat kapasitehtat mat sáhttet jávkadit dronaid. Go vákšunvuogádat lea oanehis áiggis doaimmas, de čađahit politiijat Finnmárkkus hárjehallama ovttas Suodjalusain.

Oassin hárjehallamis ožžot ássit guoskevaš guovlluin Heahtedieđáhusa.

Hárjehallama birra boahtá buori áiggis ovddalgihtii, ja heahtedieđáhusas boahtá čielgasit ovdan ahte lea dušše geahččaleapmi.