Guokte beaivvi logaldallamiid, bargobájiid ja ságastallamiid bokte galget oasseváldit guorahallat mo mii sáhttit hukset servodagaid gosa olbmot eai dušše fárre – muhto gos duođaid válljejit orrut.
Oarje-Várjjat galgá šaddat buoremus fátmmasteamis
Go giige fárre deike, de lea dego bovdet gussiid ruoktot - mii háliidit ahte sii galget dovdat iežaset buresboahtin, oidnojuvvon ja sávvojuvvon. Dát jurdda lea Oarje-Várjjaga ođđa višuvnna duogábealde: Mii galgat leat buoremusat Finnmárkkus fátmmasteamis.
"En dør inn" áŋgiruššama bokte ja ovttasbarggu bokte NTNU’ain , Viessobáŋkkuin ja Finnmarksverten-konferánssain Álttás skábmamánu 26.-27.b, de servet gielddat Bearalváhki, Báhcavuotna, Unjárga ja Deatnu ovttas ásahit báikegottiid gosa olbmot eai dušše fárre - muhto duođai ásaiduvvet.
- Mii galgat guossohit olbmuid go bohtet deike. Lea sáhka vuostáiváldimis olbmuid rabas uvssain, sáhkkevuođain ja liekkusvuođain. Buohkat galget dovdat ahte sis lea sadji dáppe, lohká Heidi Dervo, gii bargá Oarje-Várjjaga giliovdáneamis.
Buresboahtimis gullevašvuhtii
Sátnejođiheaddjit Jon Erland Balto (Deatnu), Rolf Laupstad (Berlevåg), Øyvind Hauken (Báhcavuotna) ja Berit Ranveig Nilssen (Unjárga) leat ovttas dán álgaga duogábealde. - Mii háliidit hukset kultuvrra mas fátmmasteapmi lea eanet go prošeakta. Dat galgá leat lunddolaš oassi das mo mii ovttas eallit - lágašbirrasis, bargosajiin ja eaktodáhtolašvuođa oktovuođain, dadjet sii oktasaš cealkámušas.
Sii deattuhit ahte fátmmasteamis ii leat sáhka stuorra, moalkás prográmmain, muhto smávva daguin mat dahket ahte olbmot dovdet iežaset oidnosis: modji , bovdehus, “man somá go leat dáppe.”
Go mii fátmmastit, de vuitet buohkat. Ođđa ássit ožžot oadjebasvuođa, fierpmádagaid ja gullevašvuođa. Mii geat ássat dáppe oažžut ođđa impulssaid, ustitvuođa ja energiija. Nu mii hukset Finnmárkku dakkár báikin gosa olbmot sihke fárrejit - ja bisánit, dadjá Dervo.
Mii ohcat áŋgiris oasseváldiid
Juohke gielda sádde guđa olbmo joavkku geat ovttas galget leat mielde ovddideamen báikkálaš fátmmastanstrategiija maŋŋel konferánssa.
Oasseváldit galget leat:
- Okta ealáhussuorggis
- Okta eaktodáhtolaš suorggis
- Okta kultursuorggis
- Okta nuoraid ovddasteaddji
- Okta politihkalaš jođiheaddji
- Okta hálddahuslaš jođiheaddji
Finnmárkku Spábbačiekčanbiire ja Oarje-Várjjaga giliovdáneapmi ruhtada oassálastima, mátkki ja orruma.
Dieđit iežat beroštumi!
Háliidat go leat mielde hábmemin iežat gieldda boahtteáiggi?
Berošteaddjit sáhttet dieđihit iežaset gieldda bokte dahje Heidi Dervo lusa Oarje-Várjjaga giliovdáneamis.
Unjárgga gielda: post@nesseby.kommune.no
Heidi Dervo, Oarje-Várjjaga giliovdáneapmi: heidi.dervo@tana.kommune.no
