Dás mii leat buoremusat Norggas:
- Vuosttažin riikkas bargiidlogu dáfus: Leat dušše 3,7 máná juohke bargi nammii – buoret go riikka gaskamearálaš lohku mii lea 5,6.
- Vuosttažin riikkas pedagogalaš gelbbolašvuođa dáfus: Buot bargiin lea pedagogalaš oahppu.
- Vuosttažin riikkas pedagogalaš norpma ollašuhttimis - áibbas spiehkastemiid haga.
- Vuosttažin riikkas stoahkansaji, lanjaid, ja saji dáfus juohke mánnái.
- Badjel riikkagaskameari mánáidgárdefálaldaga dáfus: 96,15 proseantta mánáidgárdeahkásaš mánáin lea mánáidgárdesadji.
Fágalaš bargu ja bargoveahka
Unjárgga gielddas lea okta mánáidgárdi mas leat 34 saji. Bohtosat čájehit ahte mánáidgárddis lea buorre fágalaš kvalitehta ja stabiila bargoveahka.
Okta sivva buriid bohtosiidda lea ahte Unjárgga gielddas leat ollu jagiid oahpahan alcceseaset pedagogaid, mii lea dagahan ahte lea alla gelbbolašvuođa ja bistevaš bargoveahka.
Ekonomiija ja resursageavaheapmi
Mánáidgárdesuorgi dagaha sullii 10 proseantta gieldda ollislaš doaibmagoluin.
Doaibmagolut juohke mánáidgárdesaji nammii leat badjel riikka gaskameari, earret eará smávvadoaibmaváttisvuođaid ja alla bargiidlogu geažil. Gielda atná dán investeremin kvalitehtii ja mánáid oadjebasvuhtii.
Doaibmabijut stabiila doibmii
Gielda lea guhkit áiggi bargan nannet mánáidgárddi bargoveaga. Giđđat 2025 juo virgáduvvui fásta sadjásaš 100 proseantta virgái, ja eanet sadjásaččat virgáduvvojedje ovdal go mánáidgárdi rahppui čakčat.
Oassin barggus sihkkarastit stabiila ja dohkálaš doaimma, almmuhuvvojedje golggotmánus gohčunsadjásašvirggit.
Gielda guldala ja čuovvula
Gielda lea duhtavaš buriid bohtosiiguin, muhto diehtá maid ahte leat leamaš hástalusat bargoveagain, ja rahpanáiggiin jávkamiid geažil.
Gielda lea ožžon cealkámušaid váhnemiin ja čuovvulit dáid dialogain mánáidgárddiin. Ulbmil lea sihkkarastit mánáidgárddi mas lea oadjebas biras ja buorre kvalitehta buot mánáide Unjárggas.
